முன்னாள் ஜனாதிபதிகளுக்கு வழங்கப்பட்டுள்ள மேலதிக வாகனத்தை மீள கையளிக்க காலக்கெடு !

முன்னாள் ஜனாதிபதிகளின் பயன்பாட்டிற்காக வழங்கப்பட்டுள்ள 2 வாகனங்களுக்கும் மேலதிகமான அரசாங்க வாகனங்களை மீள கையளிப்பதற்கான காலக்கெடு வழங்கப்பட்டுள்ளதாக ஜனாதிபதி செயலகம் தெரிவித்துள்ளது.

முன்னதாக ஜனாதிபதி செயலகத்தால், முன்னாள் ஜனாதிபதிகளுக்கு தலா 3 வாகனங்கள் வழங்கப்பட்டிருந்தன. எனினும், முன்னாள் ஜனாதிபதி ஒருவர் 2 அரசாங்க வாகனங்களை மட்டுமே பயன்படுத்த முடியும் என்ற அரசாங்கத்தின் முடிவைத் தொடர்ந்து, மீதமுள்ள வாகனத்தை திருப்பித் தருமாறு ஜனாதிபதி செயலகம் மூலம் எழுத்துப்பூர்வ கோரிக்கையொன்றை விடுத்திருந்தது.

அதன்படி, இதுவரை ஜனாதிபதி செயலகத்தில் வாகனங்களை ஒப்படைக்காதவர்களுக்கு சலுகைக் காலம் வழங்க ஜனாதிபதி செயலகம் நடவடிக்கை எடுத்துள்ளதாக ஜனாதிபதி செயலக வட்டாரங்கள் தெரிவிக்கின்றன. ஒரு அமைச்சரவை அமைச்சருக்கு வழங்கப்படும் சலுகைகள் முன்னாள் ஜனாதிபதிகளுக்கும் வழங்கப்படுகின்றன.அதன்படி, ஒரு அமைச்சரவை அமைச்சர் வழக்கமாக இரண்டு அரச வாகனங்களைப் பயன்படுத்துகிறார், அவ்வாறே முன்னாள் ஜனாதிபதிகளுக்கும் இரண்டு வாகனங்கள் ஒதுக்கப்பட்டுள்ளதாக ஜனாதிபதி செயலகம் தெரிவித்துள்ளது.